CEBU, Philippines - Tulo ka gidudahang drug pushers ang nadakpan sa tulo ka managlahing dapit sa miaging adlaw.
Nasikop ang usa ka Oliver Manayon alyas Barok, 42, molupyo sa Sitio Micabaja, Barangay Duljo-Fatima pinasikad sa search warrant nga giluwatan ni Judge Gilbert Moises sa RTC Branch 18. Nakuha gikan sa balay niini ang 32 ka gamay nga pakete nga gituohang ang sulod shabu nga mobalor og P47,200.
Samtang nasikop ‘sab si Ranilo Dalis human siya maaktohi nga nagsuyop og shabu sa maong lugar, nakuha kaniya ang pipila ka drug paraphernalia ug gamay nga shabu nga wala pa matiwas.
Nadakpan ’sab sa Sitio Pajo, Barangay Poblacion sa lungsod sa Tabuelan si James Castallanes, 30, ug nakuhaan kini og duha ka paketeng shabu human mapaliti og balor P500 nga shabu sa usa ka police poseur buyer
Wa usab kaikyas ang usa ka Edilbert Gabunada, 27, human na-buy-bust sa mga sakop sa Presinto 3 sa Mandaue City Police Office diha sa Sitio Pilit, Barangay Cabancalan.
Nakuha kaniya ang duha ka paketeng shabu ug P200 nga marked money sa mga polis.
Agi og paghingusog sa kampanya kontra illegal drugs, gitukod na sa kagamhanan sa Mandaue ang City Anti Drug Abuse Council (CADAC) nga gipangulohan ni Mayor Jonas Cortes. Kini gilangkoban sa mga department heads, mga opisyal sa Department of Education (DepEd) ug kapolisan. (BANAT NEWS)