CEBU, Philippines – Subling nipahimangno ang Mines and Geosciences Bureau-7 sa posibleng pagtumaw sa landslide ug baha nunot sa duha ka Low Pressure Area (LPA) nga gipaabot nga mosulod sa nasud.
Si MGB-7 Regional Director Loreto B. Alburo nipahimangno niadtong mga nagpuyo sa ubos sa bukid ug kilid sa kasapaan sa pagbakwit dayon sa labing luwas nga lugar kun magsugod na ang pagsige og ulan tungod sa LPA nga posibleng mahimong bagyo.
Base sa pakisusi, si Alburo nibutyag sa dakbayan sa Sugbo, kuyaw sa lunop ang mga barangay sa Kasambagan, Kinasang-an, Labangon, Mabolo ug Bonbon samtang sa dakbayan sa Mandaue ang Subangdaku, Mantuyong, Umapad, Opao, Alang-alang, Guizo, ug Pakna-an.
Samtang si DENR-7 Regional Executive Director Isabelo R. Montejo niawhag sa mga mayor ug mga barangay kapitan nga motamod sa geo-hazard threat advisories ug mopahigayon og preemptive evacuation aron malikayan nga may kinabuhing makalas sa higayon nga moigo na ang bagyo.
Ang maong advisories giluwatan ngadto sa 19 ka barangay sa dakbayan sa Sugbo nga kuyaw sa landslides sama sa Lusaran, Binaliw, Guba, Budlaan, Malubog, Buot-Taup, Busay, Sirao, Taptap, Tagbao, Tabunan, Pung-ol Sibugay,Sudlon II, Sudlon I, Sinsin, Buhisan, Pamutan, Sapangdaku ug Adlaon.
Lakip niini ang barangay Tagjaguimit, Alpaco, Balirong, Mayana, Naalad, ug Cogon sa dakbayan sa Naga; ug barangay sa Hingatmonan, Lamesa, Luca, Ginatilan, Cabasiangan, Matun-og, Cansomoroy, Gaas, Magsaysay, Cabagdalan ug Duangan sa lungsod sa Balamban.
Sa dakbayan sa Toledo ang barangay Tungkay, Pangamihan, Bagacay, Loay ug Don Andres Soriano; Lamac sa Pinamungahan; ug Agbanga, Baye, Bairan, Kanluangan ug Sak-sak sa Asturias.
Sa lungsod sa Catmon ang barangay Amancion, Anapog, Bactas, Bongyas, Ambangkaya, Cabungaan, Can-ibuang, Duyan, Ginabucan, Panalipan, Tabili ug Tinabyonan.
Sa dakbayan sa Talisay ang Doldol; Purok 3 sa Dumanjug; ug Cansalonoy sa Ronda.
Samtang nihangyo ang kagamhanan sa dakbayan sa Sugbo sa media sa paghatag og impormasyon ngadto sa katawhan kabahin sa Disaster Risk Reduction Management aron pag-edukar kanila.
Matud ni Konsehal Dave Tumulak, ang Cebu City Disaster Risk Reduction Management Council andam sila mohatag og materyal sa himoong “developmental plug” kabahin sa disaster risk reduction awareness.
Dugang ni Tumulak nga ang CCDRRMC andam mopahigayon og seminar ngadto sa tri-media ug maghuwat lang sila sa schedule ilabi na sa mga field reporters nga mopaubos sa seminar. - /GMR (BANAT NEWS)