CEBU, Philippines - Hugot ang pagpakig-alayon sa Department of Health sa Bureau of Quarantine sa Mactan Cebu International Airport human nakasulod ang usa ka pasahero nga positibo sa Middle East Respiratory Syndrome-Corona Virus (MERSs-CoV) gikan sa Dammam, Saudi Arabia. Sakay ang maong pasahero sa Cebu Pacific Flight SJ 997 gikan sa kauluhan paingon sa General Santos City. Gidala na sa Davao City ang maong pasyente.
Matud ni Rennan Cimafranca, pangulo sa Regional Epidemiology and Surveillance Unit-7, nga bisan dili paingon sa Sugbo ang maong flight, ilaha gihapon nga tan-awon kung aduna ba’y taga-Central Visayas nga nakasakay niini aron sa pagseguro nga MERS-CoV Free ang rehiyon.
Dunay awhag ang DOH sa tanang pasahero nga gikan sa gawas sa nasud nga seguraduhon gyud nga sakto ug matinud-anon ang ilang pagsuwat sa porma nga ilang suwatan pag-abot sa tugpahanan. (BANAT NEWS)