CEBU, Philippines - Ang mga kawatan wala na g’yuy kahadlok karon kay bisan ang polis sayon-sayon na lang nila nga biktimahon sa pagpangawat.
Si PO1 Adonis Arba, 27-anyos, mitaho sa iyang kaubanan nga gilungkab sa wala hiilhi nga mga kawatan ang iyang boarding house.
Matud ni Arba nga iyang gibanabana nga ang pagpangawat gihimo lapas sa alas 6 sa gabii ug nakuha sa kawatan ang iyang kalibre 45 nga pistola nga mokantidad og P22 mil.
Si SPO3 Ruel Nalzaro sa Lapu-Lapu City Police Station-5 misaysay nga si PO1 Arba nigawas sa iyang kwarto kay aduna kini gilakaw sa gawas ug gibanos ang iyang gipuy-an sa kawatan.
Sa pagbalik ni PO1 Arba nadiskobrehan niya nga bukas na ang pultahan sa boarding house ug wala na ang iyang armas nga gibilin sa kuwarto. Ang kapolisan sa Lapu-Lapu nagsusi na sa pamasin nga mailhan nila ang kawatan. (BANAT NEWS)