CEBU, Philippines - Gitugyan na sa Ramon Aboitiz Foundation, Inc. (RAFI) ug mga donors ang lima ka lawak saringan ngadto sa mga tagdumala sa Maya National High School sa lungsod sa Daanbantayan.
Kini isip katumanan sa ilang saad nga pagtabang sa mga dapit nga biktima sa bagyong Yolanda sa niaging tuig.
Pinaagi sa pakig-alayon sa Let's Help Philippines, Christ Leather Fashion, Pesch Family & Friends, Action Calligaro-Mueller Family & Friends, ang RAFI nakatigum og moabot sa P3.4 milyones aron pagtukod og balik sa lima ka lawak sa tunghaan sa Maya nga giguba sa bagyong Yolanda.
Ang bag-ong mga lawak adunay mas lig-on nga mga dapat, taas ang gihabogon sa sawog, may kisame ang atop, mas makasulod ang hangin, may kaugalingong pansayan ug lababo ang kada kuwarto ug may duha ka ceiling fans.
Ang mga nanghatag og tabang mao ang grupo sa mga Germans nga magpapatigayun nga nanimuyo na ug nagnegosyo dinhi sa nasud.
Si Romy Ronquillo, sakop sa RAFI Board of Trustees, nipadayag sa iyang dakung pasalamat ngadto sa mga donors ug malaumon nga kon ang mga langyaw manggihatagon sa mga Filipino nga nanginahanglan, mas labi pa unta kita ngadto sa atong isig-kaingon. (BANAT NEWS)