CEBU, Philippines – Mi-withdraw kagahapon si Atty. Inocencio de la Cerna isip legal counsel ni Police Senior Superintendent Romualdo Iglesia, usa sa mga suspetsado sa pagpatay ni Atty. Noel Archival ug kaubanan niini.
Si Dela Cerna miduso sa iyang motion to withdraw as counsel sa buhatan sa piskalya sa Lapu-Lapu City ug gi-copy furnished ang Cebu Provincial Prosecutor’s Office. Lakip sa iyang mosyon, ang manifestation of consent ni Iglesia nga nagtugot sa pag-terminate sa serbisyo niini ug sa iyang law office.
Matud ni de la Cerna nga human niya madawat ang resolution ni acting provincial prosecutor Jesus Rodrigo Tagaan nga nag-indict nila ni Iglesia, Senior Inspector Joselito Lerion ug PO1 Alex Bacani, kanhi opisyales sa Regional Highway Patrol Unit (RHPU)-7, iyahang gipangutana si Iglesia nga kun wa kini matagbaw sa iyang serbisyo mahimo kining mokuha og laing abogado. Si Iglesia sa iyang manifestation of consent nagkanayon nga iyang gikuha nga bag-ong abogado si Atty. Joselito Frial nga nagbase sa Manila samtang si Bacani girepresentahan kini ni Atty. Reynaldo Lugtu. Samtang si Lerion, matud ni de la Cerna wala pa niya makaestorya kun padayon ba pagkuha sa ilang serbisyo.
Sa resolution ni Tagaan iyang girekomendar ang pagpasaka sa kasong complex crime of multiple murder and frustrated murder batok kang Iglesia, Lerion ug Bacani. Apan ang kaso batok nilang Chief Inspector Eduardo Mara ug SPO4 Edwin Galan gibasura human makita nga walay igong ebidensya nga nakigkonsabo sila sa krimen. - /EIM) (BANAT NEWS)