CEBU, Philippines- Human sa taud-taud nga surveillance ug pagmonitor sa Talamban Police Station, nasikop ang usa ka lalaki nga gidudahang tigpayuhot og Nubain sa Hillside, Talamban, dakbayan sa Sugbo niadtong Sabado sa hapon. Ang dinakpan naila nga si Bagodok “Budok” Surban, alyas Shimov Surban, 38, may kapuyo sa maonglugar.
Atol sa gihimong pagpangronda sa kapolisan, nasikop ang duha ka lalaki nga nasakpang nagtusok og Nubain sa ilang bukton nga sila si Joseph Parilla Dionson, 34, taga Saint Anthony, Talamban ug Ronaldo Bellen Dionson, 42, taga sitio Kalubihan, Talamban.
Matud ni Senior Insp. Bienvenido Miral nga ilang nasakpan ang duha ka lalaki nga nagtusok og drugas sa ubos nga kuwarto sa balay nga gihimong suyupanan sa mga mopalit og drugas sa dinakpan.
Nakuha sa kapolisan gikan sa panimalay sa dinakpan ang tulo ka Nubain, lima ka syringe, walo ka wala na’y sulod nga Nubain, tulo ka pakete sa gituohang shabu, duha ka bala sa .45 pistol, tulo ka tag P100 ug tulo ka tag P500 .
Gipaslak na sa Talamban Police detention cell ang mga dinakpan nga gikatakdang pasakaan og tukmang kaso. - /GMR) (BANAT NEWS)