CEBU, Philippines - Girelibohan sa tagsa-tagsa nila ka katungdanan sugod kagahapon ang tulo ka opisyal sa kapolisan nga migamit sa sakyanan nga na-recover sa mga sakop sa PNP Theft and Robbery Section gikan sa mga daotang elemento.
Si Cebu City Police Office (CCPO) director Noli Romana miingon nga giparelibohan niya ang tulo ka opisyal aron moatubang sila og imbestigasyon sa ilang nahimo’ng kalapasan sa lagda sa kapolisan.
Ang girelibohan mao si Chief Inspector Noli Cernio pagka hepe sa Punta Princesa Police Station; Senior Inspector Elisandro Quijano, pagka hepe sa CCPO homicide section ug Inspector William Alicaba, deputy chief sa CCPO Station 2. Ang mao nga mga opisyal pareho nga nahimo’ng hepe sa TRS ug giingon nga nakagamit sa 2000 model Mitsubishi nga kotse nga nasakmit sa kapolisan nga gibiyaan sa mga tulisan. Sumala pa ni Romana nga relibohanan usab ang tulo ka mga opisyal, aron dili maapektohan ang imbestigasyon.
Matud ni Romana nga giapil niya og parelibo sila si Alicaba ug Quijano kay ang pagka rekober sa maong sakyanan ug gigamit isip service vehicle gihimo usab atol sa ilang pagka hepe sa TRS.
Si Romana miingon nga dili madawat ang pangatarongan nila ni Cernio nga kuwang og sakyanan ang TRS nga magamit sa ilang trabaho mao nga gigamit nila ang gi-impound nga kotse. Kini usab ang reaksyon ni Police Regional Office (PRO 7) director Prudencio Tom Bañas.(/RUB)(BANAT NEWS)