CEBU, Philippines- Giangkon sa hepe sa City Intelligence Branch (CIB) sa Cebu City Police Office (CCPO) nga na-insulto sila sa sunod-sunod nga tulis nga gihimo sa grupo ni Leonardo Rama sa siyudad.
Gipahayag ni Supt. Romeo Santander nga insulto na kaayo sa ilang bahin nga hangtud karon nagpadayon pa sa pagpangita sa grupo human sa tulis sa LBC Escario, ug gisundan sa Three-Sixty Pharmacy sa Bulacao.
Matud ni Santander nga abtik molikay sa balaud si Rama gumikan kay kanhi kini nagsilbing military agent sa Davao Region.
Gipasabot ni Santander nga dili nila magamit ang bisan unsa nga pasangil nga dili masikop ang grupo ni Rama. Dugang ni Santander nga gikinahanglan nila ang tabang sa publiko.
Sayo niini ang direktor sa Police Regional Office-7, Chief Supt. Prudencio Tom Bañas, miingon nga kinahanglan nga dili mag-relax ang kapolisan sa dakbayan sa Sugbo aron masikop ang maong grupo. - /GMR) (BANAT NEWS)