CEBU, Philippines- Polis nga nadestino sa Mabolo Police Station dinhi sa dakbayan sa Sugbo gidakop sa kapolisan sa Lapu-Lapu kay nakapatay kini sa iyang silingan didto sa Barangay Bangkal kagahapon sa buntag.
Si PO2 Franklin Bulaquia, 37 anyos, lumolupyo sa Sitio Kawot, Barangay Bangkal, Lapu-Lapu gitumbok nga maoy mipusil ug mipatay sa 26-anyos nga si Golgie Gestopa.
Base sa imbestigasyon nasayran nga si Bulaquia nadestino kaniadto sa Lapu-Lapu City Police Office (LCPO) Homicide Section.
Sa pasiuna nga imbestigasyon ni PO2 Joseph Cutanda nasayran nga namahaw si Gestopa uban sa iyang igsoon nga si Roello Donor alas 9:30 sa buntag diha nga niabot si Bulaquia ug gipatiran ang managsoon.
Nilakaw padung sa gawas si Bulaquia apan sa pipila ka minuto nibalik kini ug gipatiran pag-usab si Donor. Si Gestopa nisulay og pakalma sa polis apan giapil ‘sab siya pagpatid.
Wala matagbaw, gisumbag pa sa polis si Gestopa sa wala pa kini pusila makaduha ka higayon.
Ang polis nga si Bulaquia dali nga misibat gikan sa dapit nahitaboan sa krimen samtang ang biktima gidala sa Mactan Doctors Hospital apan gikataho nga namatay kini pagka ala 1:30 sa hapon.
Matud ni PO2 Cutanda nga nakakuha sila og duha ka kabhang sa 9 milimeter pistol didto sa crime scene.
Ang polis nga nakapusil sa iyang silingan miadto sa Mabolo Police Station aron pagtahan nga malinawon. Mga polis sa Lapu-Lapu mopasaka og kaso nga pagpatay batok ni PO2 Bulaquia. - /RUB) (BANAT NEWS)