Affidavit sa 14-anyos gipaabot sa CIB

CEBU, Philippines - Nagpaabot na lang karon ang mga sakop sa City Intelligence Branch sa affidavit sa 14-anyos nga babaye nga nasikop sa miaging Sabado nga nakuhaan og P6 milyones nga drugas aron mapasakaan og kaso ang iyang mga amo.

Sumala pa sa hepe sa CIB, Supt. Romeo Santander, nga nailhan na nila ang duha ka lalaki nga kauban sa maong bata.

Giingong ang usa matud ni Santander nga naa sa bilanggoan apan nagdumili siya pagbutyag kun asa kini nabilanggo.

Gidayeg ni Santander ang obserbasyon ni Konsehal Gerardo Carillo sa dakbayan sa Sugbo nga kinahanglan nga ang mga amo sa bata ang gukoron sa kapolisan inay ang bata. Tungod sa sunod-sunod nga pagdakop sa kapolisan sa mga ilegalista sa dakbayan ug sa pagkasakmit sa daghang ilegal nga drugas, nitumaw ang pagduda nga dunay shabu laboratory nga nag-operate sa dakbayan.

Gihimakak ni Santander ang maong pagduda apan siya miingon nga posibleng dili sa Sugbo mismo ang gigikanan sa drugas.

Sumala pa ni Santander nga gawas sa maong batan-on, may lain silang gipaubos karon sa pag-monitor sa dakbayan sa Sugbo nga menor de edad usab nga posibleng gihimong drug courier sa mga drug lords.

Samtang naka-uyon usab si Santander sa gihimo sa Department of Social Welfare and Development (DSWD) nga mo-pondo una og tulo ka buwan ang maong minor de edad sa ilang buhatan una ibalik sa ilang pamilya.  (BANAT NEWS)

 

Show comments