CEBU, Philippines - Duha ang patay sa aksidente sa kadalanan sa habagatang bahin sa lalawigan sa Sugbo kagahapon.
Patay ang 9-anyos nga tinun-ang babaye nga taga Dunggoan, Bolinawan, dakbayan sa Carcar human naligsi sa Ceres Bus dihang nilabang kini paingon sa eskwelahan ala 1:15 sa hapon kagahapon.
Matud ni SPO1 Eduardo Bagol nga gikan naniudto ang batang tinun-an sa ilang balay nga atbang lang sa ilang eskwelahan.
Ang bus padulong sa Bato, Samboan nga gimaneho sa usa ka Pedro Lirasan, 55, taga Talisay, Santander.
Gidali pagdala ang biktima sa Carcar District Hospital apan gideklarar nga patay na tungod sa grabeng kadaut nga naangkon.
Samtang usa ka Feliciana Figuracion Catubig, 61, taga Bonbon, Oslob ang namatay human naligsan sa usa ka L300 van nga gimaneho ni Victor Orciada Ventura, 29, taga Dauin, Negros Oriental alas 10 kagahapon sa buntag sa national highway, Looc, Oslob.
Gituohang aduna’y deperensya sa pangutok si Catubig ug naandan na sa mga residente sa Bonbon nga pirme kining mag-suroy-suroy sa kadalanan.
Dugang sa kapolisan nga nagduha-duha og labang si Catubig apan nidayun paglabang hinungdan nga wala na makapugong ang brake sa sakyanan ug nalatayan gyud ang biktima nga miresulta sa iyang kamatayun. (BANAT NEWS)