CEBU, Philippines - Patay ang usa ka lalaki human pusila sa usa ka habal-habal drayber atubangan sa iyang asawa sa Lower Manatad, lungsod sa Sibonga niadtong Sabado sa gabii.
Ang biktima naila nga si Nigel Potestas, 38, taga Can-aga sa maong lungsod samtang ang suspek naila nga si Basilio Sordilla Jr.
Matud pa ni SPO1 Antonio Sanchez sa Sibonga Police Station nga sakay sa motorsiklo ang biktima kauban ang iyang asawa nga si Alma padulong unta sa ilang balay apan gi-atangan sa suspetsado.
Mihunong si Potestas ug giduol ang suspek uban sa pag-ingon nga “way una’y gaw” apan gipusil na hinuon ang biktima sa makadaghan nga higayon igo sa lawas niini.
Dali untang gidala sa Sibonga Municipal Health Center ang biktima apan gumikan sa igo niini sa iyang lawas ug ulo nakabsan gyud sa iyang kinabuhi.
Matud ni Sanchez nga nagsuot pa og raincoat ug nagtaptap pa og senina sa nawong ang suspek apan nailhan gihapon sa asawa sa biktima.
Sumala pa ni Sanchez nga posibleng ang bugtong tuyo nga patyon mao lang ang lalaki gumikan kay wala man giapil ang asawa.
Dugang ni Sanchez nga wala nahibawo ang asawa kung nagkabikil ba ang iyang bana ug ang suspek sa nanglabay nga adlaw.
Nakuha sa kapolisan sa crime scene ang duha ka basiyo sa .45 caliber pistol nga gituohang gigamit sa suspetsado kinsa nakasibat sa wala pa masayri nga direksyon. (BANAT NEWS)