Duha apil ang lola sikop sa buy-bust

CEBU, Philippines -  Mokabat sa kapin P40 mil nga kantidad sa drugas ang nasakmit sa City Intelligence Branch (CIB) ug Mambaling Police Station sa duha ka managlahing operasyon   kagahapong adlawa, diin usa ka level 2 drug pusher ang sikop.

Ang  CIB misikop  kang Carlito “Carling” Laborera nga giingong usa ka level 2 drug pusher didto sa Villagonzalo II, Tejero, Cebu City, sa miaging gabii human sa buy-bust operation.

Matud pa ni Inspector Gomersendo Mandawe ang deputy sa CIB sa Cebu City Police Office (CCPO) nga nahinabi sa Banat News gikan sa Campo Crame ang impormasyon batok sa suspek. Nakuha sa kapulisan  ang 78 ka gagmay nga pakete.

Samtang nasikop ‘sab sa Mambaling Police Station ang usa ka 59-anyos nga si Concordia Dariman, taga Cabreros Street sa Barangay Basak-San Nicolas  human nakuhaan og drugas sa Police Station 11, pinasikad sa search warrant nga giisyu ni Regional Trial Court (RTC) Judge Gilbert Moises dinhi sa Sugbo.

Matud pa ni Sr. Insp. Gerald Soquib nga nakuha’ag 56 ka gagmay nga paketeng drugas.

Gihimakak usab dayon ni Dariman nga nalambigit kini sa ilegal nga kalihokan. "Wa koy kalibutan ana uy. Niadtong 1987 namaligya ko, miundang ko kay kusog ang dakop,” sigun pa ni Dariman. (/EIM)(BANAT NEWS)

Show comments