CEBU, Philippines - Nagtingkagol sa Cebu City Police Office detention cell ang usa ka house helper human gipasanginlang nangawat og alahas nga mokabat og usa ka milyon ka pesos sa iyang amo sa usa ka subdivision sa Barangay Banilad, dakbayan sa Sugbo. Ang suspetsado giila nga si Niña Limana Patalinghug, 20, residente sa Sitio Mahiga, barangay Banilad, dakbayan sa Sugbo nga kanhi katabang ni Atty. Jercel Maria Gimenez Mercado-Gephart.
Si PO2 Philip Taborada, imbestigador sa Theft and Robbery Section sa Cebu City Police Office (CCPO) nga nahinabi sa Banat News nga midangop sa ilang buhatan si Gephart aron i-report ang maong pagpangawat sa iyang katabang. Nasayran nga gihinayhinayan ni Patalinghug og kawat ang mga alahas nga kabilin sa ginikanan ni Gephart ug diha lang niya kini nabantayan dihang dunay usa ka alahas ni Gephart ang nahanaw apan nawala na usab si Patalinghug.
Pinaagi sa impormasyong nakuha, gisubay sa kapolisan ang gitagoan sa suspek diha sa Consolacion hinungdan sa pagkasikop niini.
Sumala pa nga pito ka mga lainlaing mga mahalong alahas nga nagkantidad og usa ka milyon ka pesos ang nawala. Apan upat lang ang na-recover nga nagkantidad og P600,000.
Samtang usa ka kwintas ug singsing usab ang naprenda na niini sa usa ka pawnshop sa dalan Colon sa Cebu City ug usa iyang gihatag sa gisugo nga nagkantidad nga P100,000. Kasong qualified theft ang ipasaka batok sa suspek. (/EIM)(BANAT NEWS)