CEBU, Philippines - Subling gipahimangnoan sa Philippine Atmospheric, Geophysical and Astronomical Services Administration (PAGASA) ang publiko labot sa epekto sa El Niño phenomenon sunod buwan.
Matud pa sa pangulo sa PAGASA-Mactan, Oscar Tabada, nga ang nasinati nga pag-uwan molanat lang niining buwana.
Kini tungod kay ang sobrang kainit sa El Niño matagamtaman sugod sa katapusang semana sa Agosto o sa unang semana sa Septiyembre. Niadto pang Hulyo nagsugod ang epekto sa El Niño apan ang grabeng kainiton karon pang Septiyembre mabatyagan sa nasud.
Tungod niini gikahadlokan nga magkuwang ang supply sa tubig ingon man pag-uga ug pagpangliki sa yuta sa kaumahan.
Giawhag sa PAGASA ang katawhan sa pagdaginot sa paggamit og tubig. (BANAT NEWS)