CEBU, Philippines - Naangol ang tulo ka tawo sa nahitabong panagbangga sa lima ka sakyanan sa barangay Dumlog, dakbayan sa Toledo kagahapon sa buntag.
Ang mga naangol nga nakaangkon og bun-og ug pangos sa kalawasan mao sila si Talino Banato, 27, taga Landahan, Toledo nga sakay sa Isuzu Elf ug Vincent Paglinawan, 39, taga Dipolog City ug kasamtangang nagpuyo sa Dumlog, Toledo ug Rodrigo Batulan, 60, taga Zamboanga nga kasamtangang nagpuyo sa lungsod sa Barili.
Ang mga sakyanan nga nagkarambola mao ang usa ka Isuzu Elf mini bus, Toyota van, Calvo passenger bus, Mazda ug duha ka motorsiklo.
Ang kapolisan sa dakbayan sa Toledo nibutyag nga ang Mazda nga gimaneho sa usa ka Wenceslao Algabre, 38, taga lungsod sa Pinamungajan, gikan sa barangay Poblacion, Toledo ug paingon sa lungsod sa Balamban.
Pag-abot sa Dumlog, kalit nibangga sa Isuzu Elf mini bus nga gimaneho ni Donato Abarquez, taga Poog, Toledo kuyog si Talino nga truck boy kinsa mag-deliver unta sa ilang karga nga mga ilimnong makahubog.
Mibangga ang Mazda sa Calvo passenger bus hinungdan sa pagkatumba sa mga nagsunod nga duha ka motorsiklo ug nabag-iran pa ang usa ka Toyota nga kasugat sa Mazda.
Natumba ug nabagnos ang mga biktima nga sakay sa duha ka motor nga sila si Vincent ug Rodrigo samtang maayong pagkapiit ni Talino nga sakay sa Isuzu Elf nga maayong pagkapiyapi sa atubangan nga bahin niini.
Samtang si Wenceslao ang drayber sa Mazda nga mibangga sa laing lima ka mga sakyanan ang boluntaryo usab nga misurender sa kapolisan ug gikustodiya na sa Toledo City Police Station. (BANAT NEWS)