CEBU, Philippines- Duha ka mga level 2 drug pushers nga babaye sikop atol sa gilusad nga managlahing buy-bust operation sa kapulisan sa dakbayan ug sa probinsya sa Sugbo, kagahapong adlawa.
Nasikop sa City Anti-Illegal Drugs Special Operations Task Group (CAIDSOTG) sa Cebu City Police Office (CCPO) ang magtiayon nga gipasanginlang nagpayuhot og ilegal nga drugas, diin ang asawa maoy giila nga level 2 drug pusher, samtang ang bana gidudahan nga usa ka hit man.
Ang duha nadakpan alas 2:45 kagahapon sa hapon sa S. Osmeña Street, Sitio Tabay, Carreta ug giila nga sila si Nanie Jabido Saballa, 42, ug Jerome Labra Saballa, 40, lumad nga napuyo sa Sitio Kalubihan, Guadalupe, Cebu City.
Matud pa ni Senior Inspector Eunil Avergonzado ang hepe sa CAIDSOTG nga nahinabi sa Banat News nagpositibo ang gihimo ang test buy batok kang Nanie human sa duha ka semanang surveillance maong gihimo ang buy-bust operation.
Nakuha sa posisyon sa mga dinakpan upat ka medium size ug usa ka gamay nga pakete sa gituohang shabu gibanabanang nagkantidad og P300 mil.
Apan giingong miresponde ang mga silingan sa duruha hinungdan nga misibat ang mga polis ug milahos sa Mabolo Police Station.
Gisubay karon ang record ni Jerome human nga nakakuha og impormasyon ang mga operatiba nga giingong usa kini ka hit man.
Samtang didto sa lungsod sa Borbon, nasikop ‘sab ang laing usa ka level 2 drug pusher nga babaye nga si Maria Fe Zamora, 38, diha sa Barangay Cadaruhan, Borbon.
Nakuha sa posisyon sa dinakpan atol sa gihimong buy-bust operation ang unom ka dagko ug usa ka gamay nga pakete sa gituhoang shabu.
Matud pa ni SPO3 Owen Baticuang sa Borbon Police Station nga nahinabi sa Banat News notado na ang suspek sa ilang lungsod hinungdan nga gilusad ang maong operasyon. - /EIM) (BANAT NEWS)