Balay natumbahan sa balete

CEBU, Philippines- Maayong pagkaguba sa kusina ug sala sa duha ka panimalay sa barangay Kamagayan, dakbayan sa Sugbo human nadat-ugan sa kahoy nga balete nga natumba kagahapon sa udto.

Tulo ka pamilya nga magsuong Español ang nag-abang sa duha ka balay nga apektado sulod sa Sanchez Compound.

Matod ni Teresa Español, 46, nga nahinabi sa Banat News, nga buntag pa lang gipahibawo na siya sa iyang anak nga daw sa nagtakilid na ang punoan sa balete kilid sa kongkretong koral.

Wala na mokompiyansa ang magsuon maong wala’y naangol sa dihang nahitabo ang ilang gikabalak-ang pagkatumba sa kahoy ngadto sa ilang gipuy-ang balay.

Matud pa ni Teresa nga dugay na unta nilang gustong ipaputol ang maong balete apan sila nahadlok basin dunay nagpuyo sa maong kahoy.

Atol sa insidente, maayong pagkaguba sa kusina sa balay ni Teresa ug ang sala sa panimalay ni Oliver Español.

Sumala pa nga karaan na kaayo ang maong kahoy.

Usa sa mga residente mitug-an nga daw sa duna’y  ilang nabantayan nga dili maayong nagpuyo sa maong kahoy kay manglimbawot ang ilang balhibo kung sila motan-aw niini.

Si Alvin Santillana, operation chief sa City Disaster Risk Reduction and Management Office, ug iyang mga sakop ang mihimo sa paglimpyo sa natumbahan sa kahoy.

Matud pa ni Santillana nga dili madali ang paglimpyo sa lugar gumikan sa kadaku sa kahoy nga mitabon sa duha ka balay.

Giawhag usab ni Santillana nga unta ang mga tawo na ang unang mohimo sa pagpul-ong sa mga kahoy sa ilang lugar kung ilang nakita nga delikado na kini nga matumba.

“Ato naman gud nang tradisyon nga mahadlok ta og baliti pero ang pinaka hadlok og matumba na hinoon,” matud ni Santillana. - /GMR) (BANAT NEWS)