CEBU, Philippines - Patay ang usa ka mamasurahay human kini nakigdinunggabay sa usa ka manghabwaay og hugaw sa kasilyas sa miaging buntag diha sa New Imus Road sa Barangay Lorega-San Miguel ning dakbayan sa Sugbo.
Ang biktima naila nga si Victoriano Miano Jr., 50, nga molupyo sa barangay Gabi sa lungsod sa Cordova. Samtang ang suspetsado naila nga si Artemio Prak, 60, molupyo sa maong barangay.
Base sa imbestigasyon sa Homicide Section sa Cebu City Police Office nga ang biktima ug ang suspetsado nag-inom og tuba sa maong tindahan. Giingong di sila managkaila apan kanunay nga mag-abot sa maong dapit aron mag-inom og tuba.
Sumala pa ni PO3 Leroy Baguio nag-abot ang duha nga pulos na hubog ug giingong gisungog ni Miano si Prak hinungdan nga nadunggaban kini sa likod, apan nailog ni Prak ang kutsilyo ni Miano ug mibawos kini pagdunggab sa dughan niini.
Natumba ang biktima sa kilid sa karsada hinungdan nga gitabang kini sa mga nakasaksi sa maong krimen. Ang suspetsado mikaratil og dagan apan naapsan sa mga tanod.
Ang biktima gidala sa usa ka concerned citizen sakay sa usa ka green nga sports utility vehicle (SUV) ngadto sa tambalanan apan giingong patay na kini pag-abot sa Cebu City Medical Center. (BANAT NEWS)