MANILA, Philippines - Patay ang usa ka lalaki nga gipusil ug gilubaluba sa makadaghang higayon dayon gikuhaan pa og usa ka dalunggan diha sa Juan Luna Extension, Tuburan, Danao City sa nakalabay nga gabii.
Ang biktima nga naila nga si Ruben Maniego, 51, usa ka traysikad drayber ug nagpuyo ra ‘sab sa maong lugar.
Matud pa ni PO1 Joseph Aledon sa Danao Police Station nga nahinabi sa Banat News nga samtang naghulat og pasahero ang biktima kalit lang naabot ang usa ka lalaki nga kalit mipusil sa biktima ug pagkahuman gidunggab pa kini sa makadaghan.
Wala pa gyud matagbaw ang suspetsado gikatahong giabis niini ang dalunggan sa biktima ug gidala sa iyang pag-ikyas gikan sa crime scene.
Sumala pa ni Aledon nga unang gipusil sa liog ang biktima apan ang mga dinunggaban maoy gituohang hinungdan sa kamatayon niini.
Matud pa ni Aledon nga nadungog sa ilang lugar nga aduna’y anting anting si Maniego ug kini maoy gituohang rason kun ngano wala kini gialang-alang og patay sa killer.
Midugang si Aledon nga duna silay nakuhang mga impormasyon nga sakop og lokal nga gun for hire ang biktima ug killer niini apan giingong nagkabikil ang grupo.
“Nawala na g’yud ang dalunggan. Gidala sa suspek, kauban ra man g’yud unta ni sila. Mga lokal nga grupo diri nga pwede ra gani nga modawat og bayad tag dos mil kung naay ipapatay,” matud pa ni PO1 Aledon. Duna nay pangalan ang kapulisan sa Danao sa maong mamumuno apan wala una nila ibutyag. (/EIM)(BANAT NEWS)