CEBU, Philippines - Usa ka gidudahang gun for hire nadakpan sa City Intelligence Branch (CIB) sa Cebu City Police Office (CCPO) human dunay residente sa New Town, Barangay Pardo, Cebu City ang mitawag og mga polis bahin sa usa ka lalaking armado nga nagbahis-bahis sa ilang dapit.
Ang nadakpan giila nga si Vicente Bughaw, 38, taga Sitio Adelfa, Bulacao, Cebu City kinsa nakuhaan og usa ka Ingram cal. 9mm submachine gun nga dunay duha ka magazine, usa ka silencer ug 30 ka mga bala.
Matud pa ni Superintendent Romeo Santander ang hepe sa CIB, nga ila pang gisubay kung dunay criminal record si Bughaw. Di motuo si Santander sa pangangkon sa suspek nga pangdepensa niya kini samtang siya naninda og saging tungod kay duna kini camouflage nga extra nga t-shirt nga gidala ug duna say silencer.
Gisusi karon sa CIB kun konektado ang suspek sa duha ka lalaking nadakpan sa Special Weapons and Tactics (SWAT Team) sa Barangay Carreta nga nakuhaan usab og susamang armas. (BANAT NEWS)