Atubangan sa tunghaan gubot sa buntag ug hapon

CEBU, Philippines - Mga barangay tanod nga gitahasan nga magbantay atubangan sa mga tunghaan kanunay’ng maproblema kay ang mga tag-iya’g motorsiklo nga maghatod og mga tinun-an anha magtapok sa duol sa gate.

Kini maoy sagad mahitabo sa mga public elementary schools panahon sa buntag ug sa hapon nga maoy tighatud ug tigkuha sa mga bata sa tunghaan.

Sa Lahug Elementary School, mga tanod sa Barangay Lahug nga idistino kanunay nga magbagolbol kay dili makasabot ang mga ginikanan nga maghatud ug magkuha sa ilang mga anak, labi na ang mga drayber og motorsiklo nga habal-habal.

Matud sa usa ka tanod nga mohatag sila og “humanitarian consideration” kun ang mga ginikanan igo lang magpakanaug sa ilang mga anak ug kun makakanaog na, adto kini mo-parking sa layo gikan sa gate. Mga sakyanan, ilabi na ang mga PUJ gidid-an g’yud unta sa paghunong atubangan sa gate sa tunghaan. Nabantayan nga ang mga tanod ug barangay traffic enforcers dili tahuron sa mga drayber, ilabi na nga sila dili manakop.

Adunay mga tanod nga gi-deputize sa CITOM ug gihatagan og katungod nga makadakop og traffic violators apan dili sila makasakmit sa lisensya sa mga drayber. (BANAT NEWS)