CEBU, Philippines - Gimandoan sa City Intelligence Branch (CIB) ang mga hepe sa kapolisan sa dakbayan sa Sugbo nga i-monitor ang presensiya sa mga robbery groups nga target ang mga malls.
Matud sa hepe sa CIB, Supt. Romeo Santander, nga human sa nahitabong pagpanulis sulod sa usa ka mall sa Cagayan de Oro City, dali usab silang nag-monitor sa posibilidad nga mobalhin sa Sugbo ang grupo.
Usa sa gimando ni Santander ang paghimo og plano matag police station nga dunay nahimutang nga mall sa ilang lugar kung unsa’y angayan nga buhaton kung mahitabo nga may tulis ug ang pagpakig-alayon sa mga security personnel.
Apil sa gibantayan sa mga operatiba ang mga lokal nga grupo sa dakbayan sa Sugbo nga posibleng mopahimulos sa kahigayunan.
Nagpadayun usab ang gihimong koordinasyon sa CIB sa CCPO ngadto na sa mga nagkalain-laing intelligence units.
Mohimo usab og profiling ang kapolisan sa bisan kinsang kadudahang mga grupo nga ilang mamonitor nga moabot sa Sugbo.
Nanawagan ang kapolisan sa katawhan nga mo-abag sa kapolisan pinaagi sa paghatag og impormasyon kung may mahibaw-an alang sa kaayohan sa Sugbo. (/GMR)(BANAT NEWS)