CEBU, Philippines - Kadaghanan sa mga tanod sa Barangay Ermita miangkon nga sila tiggamitan og gidili nga matang sa drugas ug wala na lang sila magpa-drug test sa mga sakop sa City Office for Substance Abuse Prevention (COSAP) kagahapong adlawa. Si Ermita Barangay Captain Felicisimo “Imok” Rupinta miingon nga gitangtang dayon niya ang maong mga tanod.
Matud ni Rupinta nga gihangyo g’yud niya si COSAP chief Alice Utlang nga himoan og kinalit nga drug test ang iyang 226 ka kawani sa barangay aron mailhan kun kinsa kanila ang drug users.
Si Utlang miingon nga sa 226 ka kawani, 159 lang ang nakatunga ug ang 13 kanila mihangyo nga dili na lang sila i-drug test ug miangkong tiggamitan sila og illegal drugs.
Gibutyag ni Utlang nga sa 13 ka kawani nga miangkon nga drug users, 11 kanila mga tanod, usa ang street sweeper ug ang usa garbage loader sa barangay.
Giawhag ni Rupinta ang nahisgutang mga kawani nga mo-avail sa voluntary drug rehabilitation sa COSAP. Si Kapitan Rupinta miingon nga mag-agad siya sa rekomendasyon ni Utlang.
Sa laing bahin, negatibo sa drug users ang Barangay Kamagayan bisan dunay duha ka kawani nga miangkong tiggamitan kaniadto apan mihunong na paggamit niini. Nasuta nga ang duha negatibo sa drug test.
Tungod kay notado man ang lugar sa nubain nga gamitan og syringe gisusi hasta ilang mga bukton kun dunay mga needle marks.
Matud pa ni Kapitan Raquel Avila nga daan na niya gipasidan-an ang iyang sakop nga mohunong na sa paggamit og drugas aron di mosamot kabati ang imahen sa ilang lugar. Si Utlang nasurpresa apan nalipay niini ug gideklarar niyang drug-free work place ang maong barangay. (/EIM)(BANAT NEWS)