Kanal hawanan

CEBU, Philippines - Ang paghawan sa mga panimalay daplin sa dakung  kanal sa barangay Opao, dakbayan sa Mandaue maoy makahatag og sulbad sa nagpundong tubig.

Kini ang gipadayag ni Engr. Andres Suson, assistant city engineer sa dakbayan nunot sa reklamo sa pipila ka molupyo.

Matud niya nga ang maong kanal sa barangay Opao maoy nahimong kabahin sa agianan sa tubig gikan sa sikbit nga mga barangay nga naglakip sa Umapad lahos na ngadto sa Mactan Channel.

Dugang pa ni Suson nga nahimong patay na ang maong kanal niining panahona kay gawas nga nalupa ang maong dapit nga gipundohan sa tubig daghan pa gyud ang mga panimalay nga nakatampo sa pagbara sa tubig paingon sa dagat.

Si Suson miingon nga nalakip sa istruktura nga nahimutang sa kanal nga nakaali sa pagdagayday sa tubig mao ang Presinto 5 sa Mandaue City Police Office (MCPO) nga giplano na sa kagamhanan sa dakbayan nga ibalhin.

Gitataw ni Suson nga susamang suliran usab ang nasinati sa uban pang dapit sa dakbayan nga naglakip na niini ang gitawag og Little Boracay sa barangay Cabancalan nga dugay na kaayong giugmad ang pagpalambo sa kanal apan nahunong tungod sa suliran sa mga pribadong luna nga agian sa kanal.

Si Suson miingon nga kasamtangan karong gihimoan og pagtuon ang pag-expropriate sa maong mga luna tungod kay mao lang ang nakita nilang paagi sa pagsulbad sa nasinating suliran sa pag-ayo sa mga kanal sa maong lugar. (BANAT NEWS)