CEBU, Philippines - Kinahanglang moagi og public hearing ang application sa development permit alang sa usa ka crematorium sulod sa pribadong sementeryo sa barangay Dumlog, dakbayan sa Talisay.
Gipadayag ni Konsehal Aldin Diaz nga mosuporta lang siya sa application kung adunay ipahigayong public hearing.
Si Diaz kinsa kanhi kagawad sa barangay Dumlog mi-aprobar sa report sa committee on public works and infrastructure nga nag-endorso sa application sa Greeneye Corporation kabahin sa Talisay Sanctuarium Memorial Park.
Sa gipahigayong inspection sa komitiba, ang tag-iya sa crematorium misaad nga mobutang og “road right of way” nga maagian sa mga residente diha sa lugar ug drainage.
Gipasabot ni Diaz nga seryoso ang isyu ug kinahanglang matuki uban sa mga residente sa lugar diin ang nahisgutang crematorium tukuron.
Sa motion nga giduso ni Diaz sa milabay’ng session sa konseho niadtong Martes iyang giawhag ang kapitan sa Dumlog nga si Nelson Abellana nga mopahigayon og public hearing ug mapahigayon usab og inspection ug site visit sa drainage construction ug sa provision sa road-right-of-way o karsada nga maagian.
Ang komitiba mopahigayon na og inspection ug nasuta nga duna na’y mga dokumento o mga permit sa pag-operate sa maong crematorium.
Ang maong permit naglangkub sa development permit, Housing and Land Use Regulatory Board permit, barangay clearance, sketch plan ug environmental permit.
Niadtong tuig 2012, dunay mga mipetisyon sa pagpatukod batok sa nahisgutang crematorium ug ang konseho sa barangay usab kaniadto wala mohatag og pagtugot sa construction niini.
Human sa eleksiyon niadtong 2013, giaprobahan sa bag-ong napiling mga opisyal sa barangay ang proyekto.
Mokabat ngadto sa duha ka tuig ang pag-apply sa Golden Eye Inc. alang sa operation sa Talisay Sanctuarium Memorial Park apan ang application gihiklin tungod kay ang tinguhang tukuran duol sa eskwelahan ug residential area. (BANAT NEWS)