Sunog niulbo sa Lapu-Lapu, Carmen

CEBU, Philippines - Niulbo ang sunog sa balay sa dakbayan sa Lapu-Lapu ug lungsod sa Carmen niadtong Biyernes.

Alas 5:07 sa hapon gialarma ang sunog sa panimaye sa usa ka Ellen Dungog sa sitio Carajay, Gun-ob, dakbayan sa Lapu-Lapu ug nakontrolar ang kayo sulod sa tres minutos. Si SFO1 Alvin Villaban sa Bureau of Fire Protection (BFP) sa maong dakbayan miingon nga ang nasunog hinimo sa kahoy ug semento. Nagsugod ang kayo sulod sa lawak sa panimaye ni Dungog nga ang hinungdan mao ang kalit nga pag-over heat sa airconditioning unit.

Napugngan ang pagkatap sa kayo sa mga kasikbit nga mga balay sa maong lugar samtang wala’y gikatahong naangol.

Samtang alas 7:30 sa maong adlaw gialarma usab ang sunog sa Cogon West, lungsod sa Carmen diin tulo ka mga balay nga ginama sa light material ang hingpit gyud nga naugdaw. Ang tulo ka panimaye nga nasunog gipanag-iya nilang Cesar Lao, Celodonia Bisa-o ug Vicenta Lumen.

Nakontrolar sa kabomberohan sa maong lungsod ang sunog sulod sa tres minutos ug wala’y gikatahong naangol.

Si FO1 Vox Adrian Gutib nga nahinabi sa Banat News miingon nga ang sunog nagsugod sa panimalay ni Lumen ug dali usab nga mitapon ngadto sa lain pang tulo ka mga balay nga hingpit gyud nga naugdaw.

Si Gutib miingon nga wala’y koneksiyon sa kuryente ang maong mga balay ug ang gidagkotang kandila nga gikatahong napasagdan maoy hinungdan sa kalit nga pagsilaob sa kayo nga nagbilin usab og danyos nga gibana-banang mokabat sa P280,000.  (BANAT NEWS)