CEBU, Philippines - Nagduda ang Commission on Audit sa gigastohan sa P50,000 nga kabahin sa gihatag sa Department of Agriculture alang sa Barangay Bagsakan project sa lungsod sa Tuburan.
Matud sa COA sa ilang 2013 audit report nga wala matarung paggasto ang maong pondo ug sukwahi sa nalatid sa Memorandum of Agreement tali sa DA-7 ug lungsod sa Tuburan.
Ang DA nihatag og P150 mil diin ang P100 mil alang sa pagpamalit sa gamit sa Barangay Bagsakan ug ang P50 mil ipalit sa mga abot sa mga mag-uuma.
Apan nasuta sa COA nga ang P50 mil gigasto sa pagpamalit og sabon, gatas, kape, de latang pagkaon, bugas, asukar, mantika, lamas ug uban pa.
Matud sa COA nga ang gipamalit dili mao ang nalatid sa MOA.
“In view of the foregoing, the propriety of the disbursements made from government funds was found doubtful and irregular,” ang COA nagkanayon.
Nangatarungan ang mga opisyal sa lungsod nga kanunay’ng gisusi sa DA-7 ang proyekto ug wala’y negatibong pamahayag hinoon miingon nga unahon ang pagpamalit sa abot sa mga mag-uuma.
Apan ang COA miingon nga wala’y labot ang DA-7 sa pagpatuman sa proyekto sanglit ang ilang papel mao ang paghatag sa pondo. (BANAT NEWS)