Cash assistance sa PWD gihatag na
CEBU, Philippines - Nakadawat na og tag dos mil ka pesos ang 9, 000 ka mga Persons with Disabilities (PWDs) sa ilang pinansiyal nga ayuda gikan sa siyudad sa Sugbo.
Matud ni City Treasurer Diwa Cuevas, gituyo ang paghatag sa ilang hinabang atol sa pagselebrar sa PWD month karong buwana.
Migahin ang siyudad og P19 milyones alang sa mga kwalipikadong benepisyaryo nga mga PWDs. Matud ni Dr. Ester Concha kinsa maoy pangulo sa Department of Social Welfare and Service (DSWS) sa siyudad, ang kulang nga tres mil ka pesos mahatag ini’g Disyembre.
Kagahapon, nahatagan ang mga PWDs sa kwarenta’y sais ka barangay sa North District. Samtang karong adlawa ‘sab ihatag ang hinabang sa 34 ka barangay sa South District. Sigon ni Concha, “first come, first serve basis” ang paghatag sa ayuda sa barangay hall or sports complex sa mga nagkadaiyang mga barangay.
Dugang niya nga angay nga mopresentar og PWD Identification Card ang buot mokuha sa ilang financial assistance aron ma-release ang ayuda.
Apan sa distribusyon kagahapon, aduna’y nasakpan ang mga taga-DSWS nga dili tukma ang I.D number ug ang nalista sa payroll. Matud ni Cuevas, gihatagan og lima ka adlaw sumad kagahapon ang mga wala nakakuha sa ayuda para makuha nila ang ilang bahin, kung mapakyas sila pagkuha niini ibalik kini sa panudlanan sa siyudad.
Sa laing bahin, ang presidente sa Cebu City Federation of Persons with Disabilities nga si Danny Omayan mitug-an nga aduna’y 13, 000 ka PWDs nga narehistro sa ilang pederasyon. (BANAT NEWS)
- Latest
