OCD: Glenda wa’y kadaut sa CV

CEBU, Philippines - Wala’y na-monitor ang Office of the Civil Defense-7 nga grabeng kadaut mugna sa bagyong Glenda kagahapon sa tibuok Central Visayas.

Kini sumala pa ni Vernel Balaba, Regional Operations Officer sa OCD-7, nga nahinabi sa mga tigbalita.

Matud ni Balaba nga base sa ilang nadawat nga report nga bisan pa man sa kusog nga uwan ug hangin nga nasinati sa amihanang bahin sa probinsiya sa Sugbo, wala’y gikataho nga naangol ug namatay sa maong kalamidad.

Apan gitug-an ni Balaba nga didto sa Negros Oriental duna’y duha ka magsuon nga bata ang nalumos sa suba ug namatay samtang naligo sa suba sa Tabuan atol sa kusog nga uwan.

Ang mga namatay nailhan nga sila si Joevera Jonales, 6-anyos ug Julie Jonales, 10-anyos, taga Bayawan, Negros Oriental.

Sumala pa nga wala nakabantay ang inahan sa mga bata nga naligo na diay sa suba ang iyang mga anak.

Ang OCD-7 pabiling naka-alerto bisan nakapalayo na ang bagyo gumikan sa nagpadayong pag-ulan. Gipanawagan usab ang katawhan nga dili gyud mokompiyansa ug kanunay’ng mag-monitor sa kahimtang sa panahon. (BANAT NEWS)