CEBU, Philippines- Patay diha-diha ang usa ka lalaki human dunggaba sa iyang silingan gamit ang usa kutsilyo’ng flamenco sa barangay Masa, Dumanjug niadtong Sabado.
Ang biktima giila nga si Jaime Corbonil, 43, samtang ang nagdunggab mao si Christopher Llena, silingan sa biktima sa maong lugar.
Matud ni PO1 Silvestre Zulueta sa Dumanjug Police Station nga nahinabi sa Banat News nga samtang naglakaw ang biktima kauban ang lain niya nga silingan, wala kini makabantay nga gi-atangan diay sa suspetsado ug kalit nga gihansakan sa kilid sa tiyan.
Human sa maong panghitabo, daling misibat ang suspetsado sa wala masayri’ng lugar.
Blangko pa ang kapulisan sa motibo sa krimen apan sa nakuha nila nga impormasyon dunay karaang bikil ang duha sa wala pa usab masayri nga hinungdan.
Kasong murder ang ipasaka batok sa suspetsado nga padayon pang gipangita sa kapolisan sa Dumanjug. - /GMR) (BANAT NEWS)