CEBU, Philippines- Gidakop sa kapolisan ang usa ka skateboarder nga giingong hubog ug misukol pa sa mga sakop sa City Traffic Operations Management (CITOM) ug sa polis nga misikop kaniya sa sa may eskina Osmeña Boulevard ug R. Landon, dakbayan sa Sugbo niadtong Sabado sa gabii.
Ang dinakpan naila nga si Raymundo Alamil II, 21, ulitawo ug nagpuyo sa 237 Riverside, Ibabao, Mambaling sa maong dakbayan. Matud ni PO1 Gerald Cab sa Fuente Police Station nga nahinabi sa Banat News nga una’ng gibadlong sa usa ka sakop sa CITOM si Alamil nga dili pwede ang mag-skateboard sa karsada.
Apan gikasab-an na hinoon ni Alamil ang CITOM nga mibadlong niya hinungdan nga dali kini mitawag og tabang sa kapolisan. Ang shift supervisor Fuente Police Station nga si Police Insp. Eugenio Teves, ang usa sa mga responde sa maong alarma ug naabtan pa sa maong lugar nga nakiglalis si Alamil sa CITOM personnel. Dihang giduol ni Teves, gibalikas siya ni Alamil kinsa misamot sa pagpangisog ug nagdumili sa pag-uban sa kapolisan.
Nagdumili usab kini nga mapusasan ug gumikan sa iyang paglugnot ug pagsukol, nasamad ang bukton ni Teves.
Gitanggong na sa Fuente Police Station detention cell ang dinakpan ug gikatakdang pasakaan og tukmang kaso. - /GMR) (BANAT NEWS)