CEBU, Philippines - Naangol ang usa ka 17-anyos nga lalaki human siya pusila sa ilang silingan nga misaka sa balay sa biktima didto sa Sitio Kasag, sakop sa Barangay Calawisan, dakbayan sa Lapu-Lapu kaniadto’ng Biyernes sa gabii.
Si PO1 James Estrada, sakop sa Presinto 3 sa Lapu-Lapu City Police Office, miingon nga si Amelito Decada nakaangkon og pinusilan sa iyang abaga ug gidala kini sa tambalanan sa dakbayan sa Sugbo.
Base sa pasiuna nga imbestigasyon nahibaw-an nga ang nagpusil ni Decada mao si Dionesio Cadampog, hingkod na ang panuigon ug silingan ra sa biktima.
Si Cadampog gikataho nga abtik kaayo nga misibat paingon sa kasagbotan nga bahin human niya pusila si Decada ug wala madakpi sa mga polis.
Nahibaw-an nga ang suspek gikabangi sa amahan sa biktima pipila ka adlaw na ang milabay tungod sa gitukod nga koral nga milapas na sa ilang utlanan.
Tungod sa mao nga panagbangi, ang biktima nga nahibilin sa ilang balay gisaka sa suspeck ug maoy gipahimungtan. (BANAT NEWS)