CEBU, Philippines - Grabeng naangol ang usa ka 19 anyos nga lalaki nga gidunggab sa iyang manghod didto sa Sitio Soong, Barangay Mactan, dakbayan sa Lapu-Lapu kagahapon sa buntag.
Si Eduardo Febrero nga nagpuyo sa maong dapit nakaangkon og samad- dinunggaban sa iyang bukobuko nga maoy hinungdan sa paghilandig niini sa tambalanan.
Ang midunggab sa biktima mao si Elven Febrero, 18, nga nakasibat ug wala na kini maabti sa mga polis.
Si SPO1 Allan Pantaleon sa Homicide section sa Lapu-Lapu Police Office miingon nga wala magkasinabtanay ang managsoon sa ilang gimbuhaton sa panimalay nga maoy hinungdan sa panaglalis.
Dugang pa ni SPO1 Pantaleon nga ang manghod nga wala na makapugong sa iyang kasuko mikuha og kutsilyo sa ilang kusina ug gidunggab ang bukobuko sa biktima ug dayong sibat.
Matud ni SPO1 Pantaleon nga ang biktima dali nga gihatod sa Lapu-Lapu City Hospital ug gibalhin sa Vicente Sotto Memorial Center sa dakbayan sa Sugbo. - /RUB (BANAT NEWS)