CEBU, Philippines - Nasang-at na sa Naga City Prosecutor’s Office ang kaso batok sa amahan nga miunay og hostage sa iyang asawa ug duha ka anak niadtong Sabado sa sitio Sindulan, barangay Tinaan sa maong siyudad.
Kasong illegal detention ug illegal possession of firearms ang gipasaka batok kang Veroni Bacon, 48-anyos.
Si Fiscal Napoleon Alburo maoy nipahigayon sa inquest proceeding atol sa pagpasaka og mga reklamo batok ni Bacon.
Nasayran nga ang sinumbong wala na mopaubos sa preliminary investigation ug sa korte na lang tubagon ang mga reklamo batok niya.
Matud ni Alburo nga gisulod sa kasong serious illegal detention ang kasong child abuse batok kang Bacon nunot sa paglakip sa iyang usa ka tuig pa nga anak sa pagpang-hostage.
Wala’y piyansa nga girekomendar alang sa kasong serious illegal detention nga giatubang ni Bacon.
Gi-hostage ni Bacon ang iyang asawa gumikan sa pangabubho samtang giingong ubos usab siya sa impluwensiya sa ginadiling drugas niadtong higayona. – /GMR (BANAT NEWS)