CEBU, Philippines - Patay ang drayber sa motorsiklo human nabangga ug napasok sa six-wheeler truck sa may Don Juan Climaco (Magdugo), dakbayan sa Toledo kagahapon sa buntag.
Ang namatay nailhan nga si Marvin Lasponia, 19, samtang kritikal ang usa ka Dave Habasan ug samdan si Jeffrey Secuya, pulos nagpuyo sa nahisgutang lugar.
Matud ni PO2 Celso Makidato sa traffic section sa Toledo City Police Station nga kusog ang dagan sa motorsiklo dihang nabangga ug napasok sa truck nga gimaneho ni Leonil Tatin, 21, taga Casili, dakbayan sa Mandaue.
Paingon na untang mogarahe ang truck dihang pagpadagan niini mao usab ang pag-agi sa motorsiklo hinungdan nga nasampak ug napasok sa ilawom.
Nasayran nga wala’y driver's license ang nagmaneho sa motorsiklo.
Ang duha ka angol ang gidala sa tambalanan samtang gikustodiya na sa kapolisan ang drayber sa truck ug gikatakdang pasakaan og tukmang kaso. – /GMR (BANAT NEWS)