CEBU, Philippines - Nagsinumbagay, naglinabnotay og buhok ug nagpinaakay ang lima ka mga tawo apil mga babaye human sila nagkarambola sulod sa usa ka panimalay alas 2:25 sa hapon sa Lower Bacayan, dakbayan sa Sugbo.
Giila ang mga biktima nga mao sila si Monica Catilosa, 21, ug Jerald Catilosa, 18, residente sa Upper Bacayan, dakbayan sa Sugbo.
Samtang ang mga suspetsado giila ‘sab mao sila si Vanessa Dalis, 23, Nova Dalis, 15, ug Louise Cañete, pulos nagpuyo sa maong dapit.
Matud ni PO1 Gringo Muldez nga nahinabi sa Banat News nga nagsugod ang maong panagrambol sa lima human misulong sila si Catilosa sa balay sa mga suspetsado.
Base sa report, ang rason sa maong pagsulong sa duha tungod sa pasangil nga sipsip ang mga suspek hinungdan sa ilang pagkahawa sa giabangan nga balay.
Dugang pa ni Muldez nga misulong sila si Catilosa sa pinuy-anan nila Dalis ug Cañete ug nasuta kini nga sige’g panuktok sila Cantilosa ug bagulbol og bati nga estorya kanila.
Tungod sa kapungot sa tulo migawas sila sa ilang panimalay ug daling nagkarambol ang lima nga miresulta nga nakaangkon og daghan samad sa lawas sila Cantilosa.
Daling miresponde ang kapolisan sa maong panagrambol ug dali kining gidala ang tulo sa Talamban Police Station.
Samtang gidala ang mga biktima sa Cebu City Medical Center tungod sa naangkong daghang samad sa lawas.
Dugang pa ni Muldez nga nagplano ‘sab karon nga mobalos og pagpasaka og kaso ang mga napriso gumikan kay sila ang gisulong sa duha. - /EIM (BANAT NEWS)