CEBU, Philippines - Ang mga lumolupyo ug mga motorista nga kanunay’ng mag-agian sa karsada sa Barangay Basak, dakbayan sa Lapu-Lapu nangreklamo tungod sa dugay kaayo’ng nahuman nga road repair project nga nakahasol na kaayo kanila.
Ang maong karsada nga maghitak ang lapok ug magbanaw ang tubig sa panahon nga kusog ang pagbunok sa ulan ug kun init usab ang panahon masinati usab nila ang hilabihan nga abog nga ilang mahingos.
Si Carlos Bitor, 44, taga lungsod sa Cordova miingon nga alternatibo unta nila nga agianan ang karsada sa Basak gikan sa Cordova apan tungod sa pagkagubaon sa maong dalan miundang sila sa pag-agi.
Dugang ni Bitor nga ang iyang anak nga nagtrabaho sa usa sa mga balay-patigayon sa MEPZ dili gayud makalikay sa pag-agi sa maong karsada sa pagpaingon ug pagpauli niya gikan sa iyang trabaho. Si Jay Pino nga operator sa City Traffic Management System (CTMS) sa dakbayan sa Lapu-Lapu miingon nga ang ilang buhatan nakadawat og daghang reklamo gikan sa mga motorista ug sumasakay.
Matud ni Pino nga midistino sila og mga traffic enforcers aron magiyahan ang mga motorista asa sila maayo nga moagi nga dili kaayo malangan sa ilang biyahe.
Ang proyekto nga nagpadayon pa gitumong aron mapalapdan ang karsada ug ang pagpalawom sa kanal aron malikayan na ang paglunop panahon nga kusog ang pagbunok sa ulan. (BANAT NEWS)