Idlas nasikop
CEBU, Philippines- Sikop sa mga operatiba sa Investigation and Detective Management Branch (IDMB) ang giilang notadong kawatan sa dakbayan sa Sugbo nga aduna na’y 20 ka biktima sa barangay Basak ug Quiot.
Giila ang dinakpan nga si Norman Sayson, hingkod ang panuigon ug nagpuyo sa barangay Quiot.
Sumala pa ni Sr. Supt. Noli Romana, direktor sa Cebu City Police Office, nga dugay na nilang gipanid-an ang kalihukan ni Sayson ug katapusan niining nabiktima ang igsoon sa usa ka konsehal sa Quiot.
Matud ni Chief Insp. Aileen Recla, hepe sa IDMB sa CCPO, nga modus sa suspek ang pasumangil pagbaligya og prutas ilabina ang apple aron makasulod sa usa ka panimalay nga planohan niining kawatan.
Dugang impormasyon nagkanayun nga pugson sa suspek nga mopalit ang tagbalay sa iyang baligya ilabina kung bata aron lang gyud kini makakita kung asa dapit siya posibleng makasulod.
Gihulagway ni Romana nga abtik kaayong makalikay sa kapolisan ang suspek. Pasado alas 9 sa buntag sa niaging adlaw didto sa Barangay Duljo Fatima, uban sa tabang sa mga opisyal sa barangay, ila ra gyud nasikop ang dinakpan nga bag-ohay lang nakabiktima.
Nakuha sa posesyon sa dinakpan ang daghang mga mahalong gadgets sama sa cellphones, camera, mga alahas ug duna pa’y kwarta nga P13 mil.
Gipanawagan sa kapolisan kung kinsa man kadtong nabiktima pa ni Sayson nga moadto sa ilang buhatan aron mapun-an pa ang kaso niini nga atubangon. - /GMR (BANAT NEWS)
- Latest
