CEBU, Philippines - Kritikal ang kahimtang sa usa ka babaye human nadasmagan sa naghaguros nga motorsiklo sa dalan H. Abellana, Barangay Canduman, dakbayan sa Mandaue alas-7 pasado ang takna sa miaging Biyernes sa gabii.
Ang biktima mao si Deogracias Gumalas, nagpuyo sa maong lugar ug ang nakadasmag kaniya mao si Rodyl Damaolao, 21, taga Sitio Kalubihan, Barangay Talamban, Dakbayan sa Sugbo nga nagmaneho og usa ka motorsiklo.
Si PO2 Ernesto Rivera Jr., Traffic Field Investigator sa Mandaue City Police Office (MCPO) miingon nga milabang sa karsada ang biktima apan kalit lang kining nadasmagan ni Damaolao nga nagdagan padulong sa Talamban.
Dugang pa ni PO2 Rivera nga tungod sa kusog sa pagbangga nalamba ang biktima ngadto sa sementadong karsada nga hinungdan sa grabeng pagkaangol niini.
Si PO2 Rivera miingon nga nakasinati usab og kadaut sa iyang kalawasan si Damaolao tungod kay nadakdak kini uban sa giluwanang motorsiklo.
Ang mga paramedic personnel sa Emergency Rescue Unit Foundation (ERUF) maoy nagdala sa biktima ngadto sa North General Hospital sa Barangay Banilad, dakbayan sa Mandaue.
Hinuon human sa paghatag og pasiunang pag-atiman sa mga doktor sa maong tambalanan dali usab kining gipabalhin sa mga kabanay ngadto sa Vicente Sotto Memorial Medical Center sa dakbayan sa Sugbo. (BANAT NEWS)