CEBU, Philippines - Gipang-demote ang tulo ka mga sundalo nga giingong nagmaoy ug nanion og armas sa guwardiya sa usa ka imnanan diha sa Mango Avenue ning dakbayan sa Sugbo duha ka bulan ang milabay.
Napamatud-ang sad-an sa kasong administratiba human sa gihimo nga imbestigasyon sa mga opisyal sa Central Command sila si Leand Bryce Nemil Aujero, Levy Dela Cruz ug Aljun Diocana, pulos sakop sa Intelligence Service Unit (ISU).
Si Lieutenant Colonel Jim Alagao, ang tigpamaba sa Central Command nga nahinabi sa Banat News mibutyag nga gikan sa pagka-Private First Class (Pfc), nahimo na lang sila karon nga Privates.
Matud pa ni Alagao nga gawas sa demotion ipaubos ‘sab sila sa camp restriction sud sa 181 days (unom ka buwan) ug gikatakdang ibalhin sa Mindanao.
Gihulagway ni Alagao nga usa ka dakong pagpakaulaw sa militar sa nasud ang gibuhat sa tulo ug makatarunganon lang nga sila silotan.
Nasayran nga misibog ang guwardiya sa pagpadayon sa iyang reklamo sa kaso unta nga kriminal batok sa tulo apan gipadayon ang imbestigasyon sa kasong administratiba hinungdan nga sila nasilotan.
Dugang pa sa opisyal nga unta mahimo kini nga leksyon sa uban pa nga mga sakop sa kasundalohan nga dili magpabuyag ug magsalig sa ilang pagka sundalo tungod kay duna silay kabutangan kun ilaha kining buhaton. (BANAT NEWS)