CEBU, Philippines - Gibutangan na og close circuit television (CCTV) cameras ang pipila ka importanteng lugar sa lungsod sa Santa Fe, isla sa Bantayan.
Gibutyag ni Mayor Jose Esgana nga pito ka CCTV camera ang ila na nga napahimutang sa pantalan, munisipyo, merkado, police station ug health center nga nigasto og P490 mil sa Phase I.
Tinguha sa lokal nga kagamhanan nga makabutang og 36 ka CCTV camera.
Gipasabot ni Esgana nga ang pagbutang sa mga CCTV cameras mao ang pagsumpo sa kriminalidad ug pagtubag sa emerhensiya.
Gilauman nga ang turismo sa lungsod mo-uswag tungod sa kompiyansa sa mga lokal ug langyaw nga mga turista nga mobisita sa lugar.
Ang Santa Fe dunay kapin sa 30 ka beach resorts nga duawon sa mga turista.
Samtang gisugdan na sa lokal nga kagamhanan ang pagpahimutang og “solar stud light” diha sa mga eskina sa ilang lugar diin panahon sa gabii mohayag bisan wala’y kuryente.
Namugna ang maong plano hulip sa nawagtang nga linya sa elektrisidad sa isla human sa bagyong Yolanda.
Buot sa mayor nga ang lungsod malukop sa solar lights tungod kay bisan og wala’y kuryente aduna gihapon sila’y mga suga.
Gibutyag sa mayor nga duna’y ubang non-government organizations (NGOs) ang mohatag kanila og dugang 10 ka mga solar street lights. (BANAT NEWS)