CEBU, Philippines - Subay sa pagusab-usab sa dagan sa panahon karong mga bulana ang Department of Environment and Natural Resources (DENR-7) dunay pahimangno sa Local Government Units ug barangay officials nga tun-an pagbalik ang ilang gipagawas nga geo-hazard threat advisory.
Matud sa tigpamaba sa DENR-7 Dr. Eddie Llamedo importante ang geo-hazard advisory tungod kay makita ang mga lugar nga landslide ug flood prone areas.
Giawhag usab ang mga barangay kapitan nga i-institutionalize ang early warning system sama sa paghimo og community based early response team sa mga sitio.
Si Llamedo mihatag og tip sa mga senyales nga dunay landslide nga mahitabo sa ilang lugar, ang kahoy ug poste nga moharag, di na masira ang pultahan ug dunay mogawas nga tubig sa yuta ug nangliki na.
Nasayran ang mga lugar usab nga kuyaw sa baha kadtong mga duol sa sapa, coastal areas ug kining tanan makita sa ilang geo-hazard threat advisory.
Dinhi sa dakbayan sa Sugbo ang mga bukirang bahin sa siyudad sa sama sa Sirao, Busay, Buot-taop, Sapangdaku, Bonbon, Buhisan, Agsungot, Pamutan ug Paril ang hugot nga gibantayan sa landslide.
Samtang ang Barangay Mabolo, San Jose ug pipila ka barangay sa siyudad sa Talisay ug lungsod sa Minglanilla gibantayan tungod kay delikado sa baha.
Tungod niini ang DENR-7 nanawagan sa katawhan nga dili magmagahi ug mosunod g’yud kun kinahanglan na silang ihiklin aron dili madisgrasya. (Decemay P. Padilla/EIM)
Duha ka empleyado sa Kapitolyo miikyas sa drug test
Duha ka empleyado sa Kapitolyo nga miikyas sa gipahigayon nga drug test niadtong miaging Lunes gihatagan og lain pang tsansa nga magpa drug test na.
Ang hangyo naggikan ni Gob. Hilario Davide III aron sila moapil na sa drug test sa sunod pang mga adlaw.
Kahinumdoman nga dungan nga gipaubos sa drug test ang mga pinili nga empleyado gikan sa napulo ka mga departamento sa Kapitolyo.
Ang drug test gipangunahan ni Joey Herrera, Executive Director sa Cebu Provincial Anti Drug Abuse Commission (CPDAC) ug representante sa Philippine Drug Enforcement Agency (PDEA).
Usa ka empleyado ang nagpositibo sa maong drug test niadtong Lunes ug maoy nahimong ika-15 sa mga empleyado sa Kapitolyo nga nagpositibo diin ang uban kanila gitaktak na samtang nag-atubang og kasong administratiba ang uban.
Si Davide miingon nga kinahanglanon sa probinsya ang dugang nga budget alang sa mga programa batok sa ginadiling drugas ilabi na sa umaabot nga tuig 2015. (USJR Intern/EIM) (BANAT NEWS)