CEBU, Philippines - Nipasiugda og nationwide signature campaign ang grupong Right To Know Right Now Coalition ug Kaabag sa Sugbo tumong sa pagpasar sa Freedom of Information Bill.
Ang grupong Kaabag sa Sugbo nipahigayun sa signature campaign sa Rajah Park Hotel nga gitambungan sa nagkalain-laing sektor.
Ang presidente sa Kapisanan ng mga Brodkaster sa Pilipinas (KBP)-Cebu Chapter, Jun Tagalog, mibutyag nga sukad pa sa panahon nila ni Carlo Duga-duga ug Atty. Ruphil Bañoc misuporta na sila alang sa pagpasar sa FOI Bill.
Alang kang Princess Halasan, tinun-an sa University of the Visayas ug miyembro sa Supreme Student Council, miingon nga importante gyud ang freedom of information tungod kay ang tanan dunay katungod nga mahibawo sa kalihukan sa gobiyerno.
Kahinumduman nga ang unang FOI Bill nasang-at niadtong 1992 apan hangtud karon wala pa gihapon mapasar sa Kongreso.
Kini ang hinungdan nga gihingusgan pag-ayo sa grupo ang kampanya aron hingpit na kining mahimong balaud. (BANAT NEWS)