CEBU, Philippines - Nawad-an og mokabat sa P180,000 nga salaping cash ang Save Zone Appliance Center sa Highway, Barangay Bakilid, dakbayan sa Mandaue human nga gilungkab niadtong Domingo sa kaadlawon.
Si Inspector Ricky Calong sa Presinto 2 sa Mandaue City Police Office (MCPO) mibutyag nga ang guwardiya nga si Romeo Molos maoy nakadiskubre sa maong pagpanglungkab.
Nasuta nga diha milusot sa gilungkab nga atop ug kisame ug gisakiyo ang maong cash diha sa opisina.
Dugang biktima sa pagpangawat mao si Rhodelio Gesultura, 32 nga taga Barangay Langtad, sa Argao ug kawani sa UR Meat Shop kinsa mialigar nga nahanaw ang iyang knapsack nga gisudlan sa iyang kinolektang kuwarta nga P8,700, SSS ID, PhilHealth ID, ATM Card , BIR ID ug uniporme.
Matud pa niya nag-checkup siya sa iyang gimanehong freezer van diha sa luyo ug wala niya mabantayi nga dunay mikawat sa iyang knapsack bag sa front seat. (BANAT NEWS)