CEBU, Philippines - Gihagit sa usa sa mga konsehal sa dakbayan sa Toledo ang Department of Education nga mag-una sa pagpatuman sa Gulayan sa Paaralan ug sa National Greening Program.
Tumong ni Konsehal Marjorie Joie Perales, chairman sa committee on education sa konseho, nga maangkon ang labing taas nga pasidungog gikan sa Department of Agriculture alang sa maong programa.
Una niini ang Gulayan sa Paaralan gipatuman sa tanang tunghaan sa dakbayan sa Toledo diin giawhag ang mga estudyante sa pagtanum og mga utanon ug sa pagkaon niini. Matud ni Perales nga gusto niyang masusama ang DepEd sa City Nutrition Council sa dakbayan nga permanenteng makakuha sa Crown Award sa tibuok Pilipinas.
Una nang gihatagan og 13 mil ka mga seedlings ang DepEd gikan sa DA.
Gipangapud-apud na usab ang maong mga seedlings sa dili momenos 60 ka mga tunghaan sa elementarya ug sekondarya sa siyudad ug dungan nga gitanum.
Hugot nga misuporta si Dr. Ronald Gutay, DepEd Toledo City division superintendent, sa maong programa. (BANAT NEWS)