CEBU, Philippines - Nadakpan sa kapolisan ang usa ka magpapatigayon nga gitudlo nga maoy nagsugo nga patyon unta ang tawo nga kanunay’ng mangilkil kaniya’g kwarta apan usa ka tigbaligya’g isda maoy nasaypan ug napatay sa iyang mga sinugo.
Si Victor Go Yu, 46, biyudo ug nagpuyo sa Barangay Maguikay nadakpan sa kapolisan human nga nasikop sa mga polis ang iyang gisugo nga si Giovanni Albano aron pagpapangita og makapatay sa iyang gikalagotan.
Human madakpi si Albano mitug-an kini nga si Yu maoy nagsugo kaniya nga mangita’g “gun-for-hire†nga mopatay sa tawo nga kanunay’ng mangilkil kaniya.
Si Albano maoy mikontak sa duha ka drayber og habal-habal nga sila si Regor Salazar ug Jhonry Sabejon aron patyon ang tawo nga gikasuk-an ni Yu. Apan ang duha ka “hired gunmen†nasipyat kay ang ilang napatay didto sa Barangay Basak, Mandaue mao ang fish vendor nga si Marlon Bantolinao nga dili mao ang ilang patyonon.
Sa ilang pag-ikyas, sunod-sunod sila nga nadakpan. Si Salazar una nga nadakpan nga misakay og PUJ samtang si Sabejon didto na madakpi sa Labangon.
Sa imbestigasyon, gitug-an nila nga si Albano maoy mi-hire kanila ug hinungdan nga nahibaw-an usab nga ang mastermind mao gayud si Yu. Gani si Yu nga matud pa migamit og pangalang “Victor Cimafranca†nagpadala dayon og P20 mil nga bayad alang ni Albano isip bayad ngadto sa nagpatay sa iyang gikalagotan kay wala pa man siya masayod nga dili kini mao ang tawo nga napatay sa gisugo. (/RUB)(BANAT NEWS)