CEBU, Philippines - Gikatakdang mopagawas na sa ilang report karong Lunes ang Commission on Human Rights labot sa kaso niadtong bata nga giplasteran ang baba sulod sa Cebu Puericulture and Maternity House, Inc.
Matud ni Atty. Dante Jadman sa CHR-7 nga kagahapon nagtagbo sila ug ang inter-agency task force diin iyang gipresentar ang report nga ilang gihimo. Gipahibawo ni Jadman nga karong Hunyo 30 ilang itugyan sa Regional Sub-Committee for the Welfare of Children ang resulta sa imbestigasyon.
Gibutyag ni Jadman nga aduna sila’y nakitang kalapasan sa maternity hospital apan wala sila’y gahum sa pagpasaka og kaso sanglit kutob lang sila paghatag sa rekomendasyon.
Nasayran nga kadtong upat ka mga ginikanan nga mipatim-aw wala gyud mopasaka og kaso ug ang ilang nabuhat kutob lang sa paghimo og rekomendasyon ug simpatiya sa nahitabo.
Kahinumduman nga mitumaw ang maong isyu dihang gipakita ni Ryan Noval ang picture sa iyang anak nga si Baby Yohannes nga dunay plaster ang baba sa social networking site nga Facebook ug nahimong viral dili lang sa Pilipinas apan sa tibuok kalibutan. (BANAT NEWS)