CEBU, Philippines - Mikompisal atubangan nila ni Davao City Police Chief Senior Superintendent Vicente Danao Jr., mga sakop sa pamilyang King ug sa reporter sa GMA 5 Davao, Real Sorroche, ang killer ni Richard King nga si Paul Dave Labang.
Matud pa ni Labang nga wala gayud siya nasayod nga usa diay ka iladong negosyante ang gipapatay niya.
Sumala pa sa pakighinabi sa Banat News sa reporter sa GMA 5 Davao, si Sorroche mibutyag nga nagtagbo si Labang ug sa pamilyang King sulod sa usa ka lawak sa Davao City Police Office (DCPO).
Matud pa nga wala kapugngi ni Labang ang pagtulo sa iyang luha uban sa pagpangayo og pasaylo sa pamilyang King gumikan wala gayud siya masayod nga usa ka negosyante ang iyang gipatay.
Opisyal gilambigit
Sumala pa niini nga si Superintendent Leonardo Felonia , hepe sa Regional Intelligence Unit (RIU) sa Police Regional Office (PRO) 11, ang nagsugo kaniya sa paghimo sa krimen.
Matud pa nga P30 mil ra maoy gibayad kaniya aron patyon si King nga sa iyang pagtuo, base sa background nga gihatag ni Felonia kaniya bahin kang King kay kini usa kuno ka drug lord.
Bisan wa pa siya masayod sa kamatuoran sa paghulagway kang King ug mao pay labing una niya nga higayon nga mopatay og tawo misugot siya niini kay nagtoo siya nga tinuod kini.Si King usa ka lehitimong negosyante nga nanag-iya og mga hotels ug condominiums sa Kabisay-an.
Nakonsensiya
Apan dako na lang ang iyang kahibulong sa dihang nanggawas na sa mga balita nga usa diay ka iladong negosyante sa Cebu ug Davao ang iyang gipatay.
“Nakonsensiya ko sir, wala ko nagdahom nga ingon ato diay ‘to ka maayong tawo siya sir, first time pa g’yud ‘to nako,†sumala pa sa pamahayag ni Labang nga gi-post sa Una Ka Bai Facebook fan page sa GMA Davao.
Gibutyag sab ni Labang nga nahadlok na siya sa iyang seguridad ug sa iyang pamilya ug mihangyo kini nga protektahan sila.
Sumala pa nga ang pamilya’ng King, kumbinsido sa pamahayag ni Labang .
Mihimakak
Pasado alas-7 sa gabii, Hunyo 23, boluntaryo ‘sab nga miadto sa National Bureau of Investigation (NBI)-11 si Felonia kauban si Davao City Mayor Rodrigo Duterte aron sumala pa malimpyohan ang iyang pangalan.
Si Felonia kusganong mihimakak sa alegasyon ni Labang kay matud niya wala siya’y kalambigitan sa maong krimen ug andam niya kining atubangon.
Wa pa hinuon ikonsiderar si Felonia nga suspek sa maong krimen apan ikostudiya una kini sa NBI. Lakip sa nahulog sa mga kamot sa kapulisan sa Davao ang drayber sa motorsiklo nga managsuong sila si Rodel ug Romel Dela Cerna nga giingong mga lookouts ug drayber ug nagsilbing spotters sa gunman. Nasayran sab sa Banat News nga dugay na nga managkaila ang mga suspek ug si Felonia, gumikan matud pa nagtrabaho sila isip mga “pulot boys†sa shooting range sa kapulisan.
Di pa sulbad
Apan dili pa matawag nga “case close†ang kaso bisan pa man sa pagkasikop sa mga suspek, kini matud pa ni Chief Inspector Jade Clamor ang tigpamaba sa Police Regional Office (PRO) 11 ug sa Special Operations Task Group nga nahinabi sa Banat News.
Sumala pa ni Clamor nga ila pang giimbestigaran karon kung duna pa ba’y lain nga mastermind.
Giangkon niya nga ang pagkasikop sa tulo ug ang boluntaryong pagpaubos sa imbestigasyon ni Felonia dako og matabang sa ilang imbestigasyon. (BANAT NEWS)